Ирмос: Ма́нием Твоим на земный образ преложи́ся пре́жде удоборазлива́емое водное естество, Господи; те́мже немо́кренно пешеше́ствовав Изра́иль, пое́т Тебе́ песнь побе́дную.

На одре́ мя ле́ности возлежа́ща многообра́зных грехо́в Сама́ возста́ви, Отрокови́це, здра́вие Божественное подаю́щи, да сла́влю вели́чия Твоя́, я́ко вои́стинну Препросла́вленная.

Исцели́ души́ моея́ сокруше́ние, Богоро́дице, ю́же враг ле́стию сластно́ю стрясе́, Боже́ственными лечба́ми действующи благоутро́бия Твоего́, Чи́стая, и могу́тства.

Уста́ви бу́рю страстей и сластей моих ве́тром Божественных Твоих моле́нии́, Всенепоро́чная, я́ко да в тишине́ се́рдца славосло́влю Твою́ безприкла́дную си́лу.

Сло́во вселе́нныя, Пресла́вная Де́во, Бо́га Пресла́внаго сла́вно ро́ждшая, славы сподо́би Боже́ственныя я́ко Богоро́дицу при́сно Тя сла́вящия.