Ирмос: Спаси́телю Бо́гу, в мо́ри люди немо́крыми нога́ми наста́вльшему и фарао́на со всево́инством пото́пльшему, Тому́ еди́ному пои́м, я́ко просла́вися.

Светоприе́мная свеще́, смире́нную мою ду́шу, грехми́ омраче́ну, я́ко Блага́я, све́том Твоим уясни́, песнь благода́рственную я́ко да вопию́ Ти.

Ра́дуйся, престо́ле Бо́жий, Чи́стая, Препросла́вленная; ра́дуйся, пала́то простра́нная; ра́дуйся, покро́ве ве́рою взыска́ющих Тя; ра́дуйся, цве́те ве́ры; ра́дуйся, Всечу́дная.

Ра́дуйся, ста́мно злата́я, Боже́ственную Ма́нну ужа́сно во чре́ве Твое́м вмести́вшая, Светода́вца, Де́во, и Изба́вителя Иису́са, вся утве́рждшаго во́лею Боже́ственною.

Ра́дуйся, Ма́ти Бо́жия; ра́дуйся, Де́во Нескве́рная; ра́дуйся, цве́те ве́ры; ра́дуйся, Безневе́стная Отрокови́це и Неискусому́жная, Свет всем конца́м возсия́вшая.