Ирмос: Отроцы святи́и в пещь вве́ржени иногда́, и пла́мень росоме́чущ ви́девше, Ангела кра́сна попече́нием стра́шным согла́сно трие́ воспева́ху, славосло́вяще и зову́ще: «Вся дела́, по́йте Го́спода»[33].

Боже́ственными пе́нии упещря́ю Ти песнь, вожделе́ннаго ра́ди и́же на мне покро́ва Твоего́, Чи́стая; Тя бо во искуше́ниих обрето́х ро́су живота́, боле́зни утоля́ющу и подвиза́ющу пе́ти: вся дела́, по́йте Го́спода.

Ты мне, Влады́чице, наде́жда и прибе́жище держа́вное, в настоя́щая боре́ния дости́гшу: на Тя бо упова́в, наве́та лю́тых, возмоги́й, отвраща́юся и благода́рно веща́ю: вся дела́, по́йте Го́спода.

Дале́че отринове́но бу́ди бесо́в лука́вое мно́жество, зане́ спобора́ет ми вели́кая си́ла, Сама́ Ма́ти Бо́жия, расторга́ющи се́ти ва́ша и я́ко от стрелы́ пти́цу мя соблюда́ющи, во е́же вопи́ти непреста́нно: вся дела́, по́йте Го́спода.

Еди́на препре́ла еси́ естества́ уста́вы, Нескве́рная, я́ко Сы́на безсе́менно родила́ еси́,

ку́пно иму́щи облиста́ние де́вства и сро́дство ма́терне, и Твое́ чу́до пое́тся на небеси́ и на земли́, Богоро́дице Мари́е Всепе́тая.