Ирмос: Седмери́цею пещь халде́йскии́ мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: «Отроцы благослови́те, свяще́нницы воспо́йте, лю́дие превозноси́те во вся ве́ки».

Богороди́тельнице Влады́чице, ве́рных держа́во, Твоими к Сы́ну ма́терними мольба́ми Того́ мне уми́лостиви, вои́стинну Благоми́лостиваго, и грехо́в моих рукописа́ние раздери́, и покажи́ мя спаса́емых ча́сти насле́дника, да велича́ю Тя во вся ве́ки.

Яже в ну́ждах спаса́ющая и те́пле заступа́ющая всех в ско́рби су́щих, Всесвята́я Влады́чице, умилосе́рдися, спаси́ мя и па́дша воздви́гни, ру́ку по́мощи пре́жде конца́ подаю́щи, да не нощь сме́ртная обы́мет мя спя́ща, и по до́лгу сла́влю Тя во вся ве́ки.

Ины́я не вем по́мощи, ра́зве Тебе́, Влады́чице, оба́че Твоего́ к Бо́гу не стяжа́х примире́ния; поми́луй, Нескве́рная, мя погиба́юща беззако́нных ра́ди я́же от младе́нства дея́ний моих, и спаси́ вопию́ща: ра́дуйся, Благослове́нная; ра́дуйся, Препросла́вленная во вся ве́ки.

Небодо́лгую ле́ствицу у́мную ве́мы Тя, е́юже челове́ком Вы́шний, с пло́тию снизше́д, примеси́ся, и смире́нныя возне́се к небе́сных высо́кому жи́тельству. Отону́дуже вы́шшую небе́с, а́нгелов же и всех творе́ний Тя пропове́мы, Отрокови́це.