Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Прему́дрость и Сло́во пропове́дуем, Сы́на Отча Преве́чнаго, все́льшася существи́тельне во утро́бу Твою́, Нескве́рная, и крепча́йшим назда́нием нас обо́жшаго.

Уста́вивый го́ры ма́нием, го́ру мы́сленну Тя, Богоблагода́тная, показа́, доброде́тельми осене́ну, из нея́же Той плоть Себе́ изсече́.

Ядом угрызе́на зми́евым, род наш прама́ти погуби́, от Твоего́ же, Пречи́стая, несказа́ннаго Рождества́, обожа́ется естество́ все о́бразом лу́чшим.

Пропове́дую, зря чудеса́ па́че ума́ же и ве́дения: ка́ко Невме́стный в Тебе́ неизме́нно вмести́лся есть, ка́ко быва́ет тварь Зижди́тель, Влады́чице?

Седален, глас четвертый. Подобен:Ско́ро предвари́:

На враги́ ополчи́ся, борющия ны, лю́то бо наидо́ша на достоя́ние Твое́, Всецари́це Мари́е; погуби́ самору́чно ва́рваров де́рзости, да уве́дят кре́пость Твою́ любобра́ннии язы́цы, Боже́ственным Твоим ма́нием вся потреби́.