Ирмос: Яко по су́ху пешеше́ствовав Изра́иль по бе́здне стопа́ми, гони́теля фарао́на ви́дя потопля́ема, «Бо́гу побе́дную песнь пои́м» вопия́ше.

Ка́пле подо́бно ма́леи́, лука́ви и ма́ли дни́е мой, време́н обноше́нием иждива́еми, оскуде́ша пома́лу: се, Влады́чице, спаси́ мя.

Обдержи́т ны́не ду́шу мою́ страх мног, тре́пет неисповеди́м и боле́знен есть, внегда́ исходи́ти ей от телесе́: Чи́стая, ту́ю уте́ши.

Гре́шных изве́стное прибе́жище, на мне извести́ Твою́ ми́лость, Чи́стая, и бесо́вския изми́ руки́, зане́ я́ко пси мно́зи ти́и мя обыдо́ша.

Се вре́мя по́мощи, се вре́мя Твоего́ заступле́ния, се, Влады́чице, вре́мя, о не́мже во дни и в нощи́ призыва́ют те́пле и мо́лят Тя.