Ирмос: Седмери́цею пещь халде́йскии́ мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и Изба́вителю вопия́ше: «Отроцы благослови́те, свяще́нницы воспо́йте, лю́дие превозноси́те во вся ве́ки».

Коле́на иногда́ беззако́нному чти́лищу не прекло́ньше, о́троцы во огнь возгнеще́н вверго́шася, и неопа́льни пребы́ша. Аз же, сласте́м повину́выйся, и́мам во огнь воврещи́ся ве́чный и посещи́ся и пла́катися; но пощади́ мя, Отрокови́це, обраще́ние подаю́щи Боже́ственными Твоими мольба́ми.

Сла́сти теле́сныя, безчи́нна двиза́ния и премене́ния естества́, зле соверша́емая, че́рвию неусы́пну посыла́ют в сих пребыва́ющих всеконе́чно и покая́ния не прине́сших; что сотворю́, окая́нный аз? Оба́че к Тебе́ прибега́ю, Отрокови́це: уще́дри мя.

Прии́мши, Нескве́рная, Огнь Божества́ во утро́бе Твое́й, попали́ все страсте́й моих вещество́, молю́ся: ум озари́ и се́рдце просвети́, и вся́каго мя вре́да изба́ви, вопию́ща: о́троцы благословите, свяще́нницы воспо́йте, лю́дие превозноси́те во вся ве́ки.

Всели́выйся Госпо́дь в нескве́рную утро́бу Твою́, друго́е не́бо Тя на земли́ показа́, Мари́е Всепе́тая; те́мже ве́рно зову́ Ти: от всех мя земны́х искуше́ний и бед спаси́, и вся́ка прило́га бесо́вска, боле́зней и согреше́ний, Свята́я Богороди́тельнице.