Ирмос: Гряди́те, лю́дие, пои́м песнь Христу́ Бо́гу, раздельшему мо́ре и наста́вльшему лю́ди, я́же изведе́ из рабо́ты еги́петскии́, я́ко просла́вися.

Сла́ва Рождеству́ Твоему́, Всенепоро́чная: Той бо су́щим из Ада́ма искупле́ние благовести́л и ме́ртвым от ве́ка безсме́ртия путь обнови́л есть.

Ты еси́ злата́я кади́льница, в не́йже рукописа́ние пра́отче сожже́ся, Влады́чице, Боже́ственному огню́ приобщи́вшеся Иже в Тебе́ Угля.

Ра́дуйся, злата́я ста́мно манноприе́мнице; ра́дуйся, исто́чниче неистоща́емый живы́я воды́, Богоро́дице Де́во, оживля́яй и ороша́яй пою́щия Тя.

Богоразу́мием вси обогати́хомся, позна́вше Тя, Влады́чице, Богома́терь и Госпожу́ всех, де́лы словеса́ печатле́юще.