Ирмос: Пла́вающаго в молве́ жите́йских попече́ний, с корабле́м потопля́ема грехи́ и душетле́нному зве́рю примета́ема, я́ко Ио́на, Христе́, вопию Ти: из смертоносный глубины́ возведи́ мя.

Мно́жество а́нгел, херуви́м, престо́лов и у́мный весь чин я́ко превы́шшую их, Богома́ти, Тя велича́ют, мы же земни́и и до́льнии, грехо́в от Тебе́ оставле́ния испроша́ем.

Небе́с еси́ и всея́ земли́ ши́ршая и всех тва́рей святе́йшая, и кто возмо́жет досто́йно воспе́ти Тя? Оба́че произволе́ние мое́ прие́мли и согреше́ний, Чи́стая, подава́й ми проще́ние.

Око пролия́вшееся[91]и зри́мыми отреша́емо, уму́ не оставля́ет в восхожде́ниих премину́ти к созерца́ния высоте́, но па́че, Богороди́тельнице, к плотски́м низвлачи́т его́ многоча́стным страсте́м.

Соломо́н в кни́зе пе́сненней жениха́ и невесты́ пропису́ет бесе́ду, Бо́га и души́ объявля́я соедине́ние. Си́це сочта́тися и мне моли́ Иже из Тебе́, Чи́стая, безсе́менно Произше́дшему.

Седален, глас седьмый. Подобен:Плод чре́ва:

Ника́коже и́нуде упова́ем на́шего спасе́ния обрести́, Пренепоро́чная, а́ще не от Тебе́ по́мощи ско́ро улучи́м, те́мже Тя велича́ем.