Ирмос: Ру́це распростер Даниил, львов зияния в ро́ве затче́; огненную же силу угаси́ша, доброде́телию препоя́савшеся благоче́стия рачи́тели о́троцы, взыва́юще: «Благослови́те, вся дела́ Госпо́дня, Го́спода».

Да уви́жду свет моле́ний Твоих, Свет ро́ждшая челове́ком неизрече́нный, и чу́вства души́ моея́, Нескве́рная, просвеща́ющая, неве́дения же тьму отъе́млющая, и да вопию́: Светороди́тельнице, ра́дуйся, Всенепоро́чная.

Тьму страсте́й моих, Све́та о́блаче одушевле́нный, Всечестна́я Мари́е, светоно́сною просвети́ мольбо́ю, и ум мой уясни́, да зову́ Ти, спаса́емы Светороди́тельнице, ра́дуйся, Пречи́стая.

Бога́тно и просвеще́ния испо́лнь моле́ние Твое́, Всепе́тая, ми́ра вся концы́ озаря́я и ве́рных уясня́я сердца́, вопию́щих: Светороди́тельнице, ра́дуйся, Нескве́рная.

Песнь Тебе́ принести́ никто́же досто́ин, Отрокови́це Всесве́тлая, Ты бо, Всенепоро́чная, родила́ еси́ па́че смы́сла Светода́вца Христа́, просвеща́юща ду́ши зову́щих: Светороди́тельнице, ра́дуйся, Всецари́це.