Ирмос: Вознесе́на Тя ви́девши Це́рковь на кресте́, Со́лнце пра́ведное, ста в чи́не свое́м, досто́йно взыва́ющи: сла́ва си́ле Твое́й, Го́споди.

От мир Сы́на Твоего́, благоуха́ние живота́ всем точа́щих, безстра́стия ми́ро души́ мое́й, Нескве́рная, источи́, и вся́кую ти́ну страсте́й ея́ очи́сти.

Очерне́на мя ка́лом греха́, окропи́ иссо́пом Твоих моли́тв, и омы́й, и от скве́рны страсте́й очи́сти, Влады́чице, и покажи́ жили́ще Христо́во.

Написа́ну Тя пе́рстом Боже́ственным кни́гу запечатле́нну молю́, Всечи́стая: моли́тв перста́ми Твоих оставле́ние мне грехо́в напиши́ и страсте́й избавле́ние.

Иже на версе́х гор святы́х дом Бо́жий бы́вшая, я́ко пре́жде проро́к рече́, дом Христо́в очище́н покажи́ мя, Влады́чице, Твоими предста́тельствы.