Ирмос: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни, Боже́ственную песнь поя́ху: «Благослови́те, вся дела́ Госпо́дня, Го́спода и превозноси́те во вся ве́ки».

Непоро́чен никто́же от челове́к, а́ще у́бо есть сему́ и день еди́н в житии́; аз же, состаре́выйся во гресе́х, ника́коже вся́кия зло́бы возненави́дех. Тем уще́дри мя, покая́нием уцелому́дри и спаси, Богоро́дице.

Сле́зы ми даждь умиле́ния, Де́во, я́коже гво́здие зла́то в окая́нную мою́ во́нзши ду́шу, да и́мам вы́ну па́мять и труд злых слове́с и дея́ний; Ты бо еси́ приста́нище обурева́емых, и ненаде́жных наде́жда и предста́тельство.

Изба́ви мя от ви́димых и неви́димых враг, от бед, напа́стей, боле́зней и искуше́ний разли́чных, Нескве́рная, окая́ннаго и всестра́стнаго раба́ Твоего́, пою́ща: вся дела́ Госпо́дня, Го́спода по́йте и превозноси́те во вся ве́ки.

Бе́здну страсте́й моих, Богороди́тельнице, ка́ко покая́ние изсуши́т, а́ще не вве́ржется ми и огнь у́мный, его́же воврещи́ весть Христо́с, Сын Твой, в ду́ши всегда́. Сего́ моли́ ча́сти спасе́нных сподо́бити смире́нную мою́ ду́шу.