Ирмос: Не тле́ния искуше́нием ро́ждшая и Всехитрецу́ Сло́ву плоть взаимода́вшая, Ма́ти Неискусому́жная Де́во Богоро́дице, прия́телище Нестерпи́маго, село́ Невмести́маго Зижди́теля Твоего́, Тя велича́ем.

Не соблюды́й, Влады́чице, о́браза неврежде́нное, его́же человеколю́бно восприя́т от Зижди́теля моего́, вся́чески испо́лнен бых зло́бы; еди́на сло́вом Творца́ прие́мшая и ро́ждшая нетле́нно, спаси́ мя.

О, сове́та вражде́бнейша! о науче́ния лю́та, его́же потерпе́х, Богороди́тельнице! о, безме́рных моих зол! Препре́н бых безу́мно и низведо́хся пло́ти сладостра́стием, и приидо́х в поги́бель.

О, кии́ страх и тре́пет бу́дет, Нескве́рная, егда́ ся́дет Созда́тель суди́ти вся́ческая! О, ка́ко уви́жду моя́ дея́ния безме́стна, го́рько осужда́ющая окая́нную ду́шу мою́! Пре́жде да́же не дости́гну конца́, спаси́ мя.

Якоже от сна и пия́нства мно́га, возни́кни, душе́, от нераде́ния и небреже́ния моего́, и ле́ности испраздни́вшися и вся́кое оцепене́ние тя́жкое отря́сши, а́ще и по́зде, лу́чшу себе́ сотвори́.

Стихиры, глас седьмый. Подобны:Днесь бдит Иу́да:

Ра́дуйся, не́бо, преми́рнаго ли́ка честне́йшее, све́тлыми доброде́телей, Де́во, свеща́ми и благода́тей Боже́ственных уясня́емо, от него́же пра́вды нам возсия́ Со́лнце, и день незаходи́мь све́том Своим соде́я во спасе́ние всех челове́ков.

Ра́дуйся, Ма́ти еди́на безму́жная, в ма́терех чисто́тствующая и е́же от ма́тереи́ проти́ву дев иму́щая естество́, чуде́с всех нове́йшее чу́до! Ра́дуйся, Де́во, еди́на нетле́нна в де́вах Роди́тельнице, и е́же от дев нося́щая проти́ву ма́терей, зна́мений всех ужа́снейшее глаго́лание.

Ра́дуйся, ста́кти благово́ннейшая; ра́дуйся, кинамо́не честны́й; фимиа́ме, ра́дуйся, из рая́ мы́сленна при́сно иска́паяй; ра́дуйся, Боже́ственный на́рде, Яже от валсамоде́лия[86]Твоего́ мироуха́нна Ми́ро ро́ждшая многоце́нное Христа́, Имже ца́рственное свяще́нство помазу́ется.

Приклони́ мне тре́бующу любоблаго́е у́хо Твое́, и не отве́ржи от лица́ Твоего́, Всенепоро́чная, и не дале́че посли́ от Твоея́ по́мощи; ле́стию бо лука́вый тщи́тся мене́ погуби́ти, безслове́сными страстьми́ се́рдце мое́ движа́; Ты же мя соблюди́ всего́ вре́да его́ неприча́стна.