Ирмос: Обы́де нас после́дняя бе́здна, несть избавля́яй, вмени́хомся я́ко о́вцы заколе́ния, спаса́ лю́ди Твоя́, Бо́же наш: Ты бо кре́пость немощству́ющих и исправле́ние.

Разве́явши, Де́во, моле́нии Твоими лопа́тою Ду́ха сто́ги грехо́в моих, очи́сти се́рдца моего́ гумно́, дале́че от него́ всяк плевови́дный творя́щи по́мысл.

Зря́щи мое́ озлобле́ние, Всенепоро́чная, и́мже душа́ держи́ма есть во Еги́пте страсте́й, я́ко плинфотворя́щая[19]бре́ние пло́ти, ско́ро гряди́ и рабо́ты безче́стныя мя изба́ви.

Стряса́юся утро́бами и сообраща́юся, вре́мя скончава́емо живота́ моего́ зря и мене́ сама́го всегда́ претыка́ющася и ра́нам прилага́юща ра́ны и я́звы.

Ны́не прибли́жися, душе́, коне́ц, прибли́жися; отложи́ у́бо вся тьмы и но́щи дела́ лю́тая и в све́та ору́жие облецы́ся, ходи́ти я́ко во дни, творя́щи благообра́зная.

Седален, глас первый. Подобен:Лик а́нгельскии́:

День та́инствен показа́ла еси́, Де́во, Со́лнце Христа́ возсия́вши всем во тьме неве́дения су́щим, Богоневе́сто. Те́мже вси Тобо́ю просве́щшеся, блажи́м Тя по до́лгу, я́ко вину́ челове́ков назда́ния[20].