Ирмос: Безсе́меннаго зача́тия Рождество́ несказа́нное, Ма́тере безму́жныя нетле́нен Плод, Бо́жие бо Рожде́ние обновля́ет естества́. Те́мже Тя вси ро́ди, я́ко Богоневе́стную Ма́терь, правосла́вно велича́ем.

Осужде́н и вся́чески неиспра́влен окая́нный аз, всем пови́нен, ины́я осуди́х су́щия неосужде́ны; го́ре мне тогда́ во вре́мя суда́, Де́во, я́ко и́мам осуди́тися.

Плене́на взят мя и тщи́тся погуби́ти диа́вол, всех хотя́й погуби́ти, но умилосе́рдися, и не преда́ждь, Отрокови́це, враго́м, и не оста́ви поги́бнути недосто́йнаго моле́бника Твоего́.

Упова́ние непосты́дное, по́моще и покро́ве, прибе́жище мое́ и те́плое заступле́ние, помози́ ми тогда́ на бу́дущем суде́, и изба́ви вся́каго преще́ния, и сы́на Ца́рствия Сы́на Твоего́ покажи́, Нескве́рная.

Пою́ Твою́, Всепе́тая, сла́ву, могу́тство светле́йшее и ми́лость неизрече́нну благоутро́бия и человеколю́бия Твоего́, и молю́ся, Блага́я, да не отпаду́ упова́ния, но да улучу́ сла́вы Твоей.

Стихиры, глас шестый. Подобны:Все отло́жше:

Ра́дуйся, Боже́ственное жили́ще всех Бо́га и Влады́ки; ра́дуйся, му́чеников кре́посте и неувяда́емый ве́нче, ве́рных утвержде́ние и преподо́бных сла́во; ра́дуйся, Ма́ти Неискусобра́чная; ра́дуйся, небе́сных сил похвало́, проро́ков основа́ние и апо́столов пропове́дание; ра́дуйся, Чи́стая, пре́лести заблужде́ние попра́вшая; грехо́в очище́ние, ра́дуйся, Матероде́во.

Ра́дуйся, Све́та жили́ще, Нескве́рная, Всесвята́я; ра́дуйся, сто́лпе о́гненный, и́мже путе води́ми бы́хом, тли прича́стницы, к небе́сней сла́ве блаже́нней и поко́ю негибну́щу; ра́дуйся, лозо́, Грозд жи́зни прозя́бшая, мсто иска́паяй и злобы́ пия́нство отъе́мляй, и весе́лия вино́м напая́яй ве́рныя, я́ко Богороди́тельницу Тя испове́дующия.

Ра́дуйся, пала́то светле́йшая Царя́ и Го́спода; ра́дуйся, гра́де одушевле́нный Влады́ки всех; ра́дуйся, еди́ный покро́ве неразори́мый и изве́стный моля́щихся Тебе́ ве́рою; ра́дуйся, спасе́ние ми́рови и те́плое очисти́лище; ра́дуйся, угаси́вшая многобо́жия пещь; ра́дуйся, а́нгелов Боже́ственная ра́досте, и челове́ков держа́вная и неги́блемая, Влады́чице, по́моще.

Приими́ моле́ние мое́, Богороди́тельнице Мари́е, и не отве́ржи мене́ недосто́йна от лица́ Твоего́, зане́ я́ко никто́же ин на земли́, Всечи́стая, в челове́цех согреши́х. Те́мже Боже́ственныя Твоея́ благода́ти испроша́ю, всеокая́нный: предваря́вши мя ны́не, уще́дри боле́зненно одержи́ма, и бе́дствовати не оста́ви в коне́ц на Тя еди́ну возупова́вша, Влады́чице, всех спасе́ние.