Ирмос: При́зри на пе́ния рабо́в, Благоде́телю, врага́ смиряя вознесе́нную горды́ню, нося́й же, Всеви́дче, греха́ превы́ше, непоколе́блемо утвержде́нныя, Бла́же, певцы́ основа́нием ве́ры.

Ны́не моле́нием Ма́тере Твоей, Всецарю́, от прираже́ний враг ви́димых и неви́димых соблюда́й вся: есть бо Та еди́на стена́ и похвала́, Юже я́ко и́стинную Предста́тельницу сла́вим.

Приими́ песнь ми́лостивно, о Де́во, и уста́ви враг лю́тых преще́ние, е́же Тебе́ покланя́ющимся жестоковы́йнии ху́льными словесы́ нано́сят безбо́жно; истни́ тех, я́ко прах, шата́ние.

Де́лом проро́цы Всенескве́рное Сло́во от Тебе́ богоза́рно Ма́тере Неискусобра́чныя дре́вле провозвести́ша, Чи́стая Де́во; Ты бо, исхода́таивши Боже́ственным рождество́м, подала́ еси́ нам согреше́ний избавле́ние.

Христо́во прия́телище и огнепа́льную купину́, храм честны́й и мы́сленный све́щник, жезл и трапе́зу, от Нея́же Пита́яй вся прозябе́, Богоро́дице, богови́дцев Тя усмотря́ше собо́р.