Ирмос: Внача́ле небеса́ всеси́льным сло́вом Твоим утвержда́й, Го́споди Спа́се, и вседе́тельным и Бо́жиим Ду́хом всю си́лу их, на недви́жимем мя ка́мени испове́дания Твоего́ утверди́.

Боговеща́нный Иезеки́иль сви́ток иногда́ Тя прови́де, в не́мже Сло́во написа́ся, Чи́стая, пе́рстом Отчим; те́мже молю́ Тя в кни́зе написа́ти мя живота́, лука́вное написа́ние беззако́ний моих раздра́вши.

Тя Дании́л чу́дный прови́де го́ру, от нея́же ка́мень отсече́ся Христо́с, сокруши́вый, Чи́стая, де́монския куми́ры; те́мже я́ко всех Тя взыва́юще песносло́вим вину́, изба́вленнии рождество́м Твоим.

Багряни́цу пло́ти от Твоих нескве́рных крове́й истка́ всех Царь, и сию́ кроме́ тле́ния понесы́й естество́м Бог же и Челове́к, из Тебе́ про́йде, Де́во, Ца́рство име́яй непрее́мное.

Яже Бо́га безболе́зненно и безстра́стно ро́ждшая, многостра́стнаго се́рдца боле́зни моего́ посети́, молю́ся, Боже́ственным Твоим посеще́нием: Ты бо ми́ру покро́в, Влады́чице, и заступле́ние.