Ирмос: Во́ду проше́д я́ко су́шу, и еги́петскаго зла избежа́в, изра́ильтянин вопия́ше: «Изба́вителю и Бо́гу на́шему пои́м».

Уста́ моя́ испо́лни, Отрокови́це, Божественныя сла́дости Твоея́, и просвети́ ум мой, я́ко да воспева́ю и велича́ю щедро́т Твоих пучи́ну безме́рную.

Немощству́ющее лю́тыми страстьми́ се́рдце мое́ и мно́гою тягото́ю боле́знующее, уврачу́й, Дево, Врача́ душ ро́ждшая.

Вы́шша покажи́ мя сласте́й плотски́х, тене́т же и попече́ний жите́йских, сил небе́сных превы́шшая и со́лнца светле́йшая, Богоневе́сто.

Благослове́нную в жена́х и просла́вленную молю́ Тя гла́са благослове́нна послуша́ти ми Сы́на Твоего́ и сла́вы Его́ улучи́ти.