Ирмос: Безсе́меннаго зача́тия Рождество́ несказа́нное, Ма́тере безму́жныя нетле́нен Плод, Бо́жие бо Рожде́ние обновля́ет естества́. Те́мже Тя вси ро́ди, я́ко Богоневе́стную Ма́терь, правосла́вно велича́ем.

Неве́стник уготовля́ется на небесе́х, Богоневе́сто, от Сы́на Твоего́, ра́дости вся́кия испо́лнь и́же Сего́ повеле́ния непоро́чно сохра́ньшим, мне же тьма и вопль и огнь гее́нск, и́хже изба́витися ми помоли́ся.

По́тове, сле́зы же и труд на три́знищи сем мета́ются, та́мо у́бо венцы́ и по́чести и дая́ния, и кто блаже́н вои́стинну? Иже пла́чущ се́ет, жнет ра́дуяся.

Окриля́еми быва́ют покая́нием, Всенепоро́чная, па́дшии, а́бие я́ко я́стреби лета́ние творя́ще к небеса́м у́мным; и́хже ча́сти беззако́нный и сам сподо́блюся, моле́нием Твоим спаса́емь.

Яко ми́лости Бе́здну ро́ждшая, поми́луй мя, и изба́ви суда́ и му́ки, Влады́чице, неключи́маго раба́ Твоего́, и Ца́рствия Небе́снаго, Де́во, сподо́би, да любо́вию велича́ю Тя.

Стихиры, глас шестый. Подобен:Все отло́жше:

Ра́дуйся, Отца́ Нескве́рная Дщи́, Ма́ти Сло́ва; ра́дуйся, Неве́сто Ду́ха, престо́лов превы́шшая, серафи́м пла́меннейшая и лу́чшая, херуви́м разу́мнейшая, госпо́дств же госпо́дственнейшая, сил сильне́йшая и нача́л нача́льственнейшая, арха́нгел же воинствосло́внейшая, па́че а́нгел ве́рным служа́щая, спасе́ния улучи́ти хотя́щим.

Ра́дуйся, Цари́це всех цари́ц, Богоро́дице; ра́дуйся, небе́сных всех си́л преиму́щая; ра́дуйся, земли́ и мо́ря еди́на Влады́чице, и тва́ри всея́. Ра́дуйся, держа́внейший ски́птре и до́блее утвержде́ние, си́ло ца́рствующих и держа́во, Всепе́тая; ра́дуйся, Боже́ственный вертогра́де;

а́дово, ра́дуйся, умерщвле́ние, Чи́стая; ра́дуйся, христиа́н прибе́жище; ра́дуйся, Благослове́нная.

Ра́дуйся, престо́ле о́гнен Царя́ и Го́спода; ра́дуйся, Боже́ственная трапе́зо, Хлеб посреде́ небе́сный нося́щая; ра́дуйся, земле́ благопло́дная, Клас живота́ воспита́вшая, от Него́же яду́щии сме́рти не у́зрят, Влады́чице, но к жи́зни ве́чнеи́ возво́дятся, я́коже прорече́ еди́н всех Влады́ка, Пита́тель и Содержи́тель; ра́дуйся, ве́рных прибе́жище, ра́дуйся, Пречу́дная.

Тя Всевзбра́нную мо́лим, Де́во, и ми́ли ся де́ем, бие́ми лю́то скорбьми́: я́ко си́лу ма́терню иму́щи ко Го́споду, враги́ на́ша разори́, да не реку́т: «Где есть Бог, Ему́же слу́жат?», и да уве́дят окаяннии, яко Тя едину стяжахом покров, и предста́тельство, и по Бо́зе столп кре́пок; не пре́зри, Всепе́тая, к Тебе́ притека́ющия.