Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́, возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

Еди́ну де́вствующую по рождестве́ Мари́ю святы́х Святе́йшую, и́стинно Неискусобра́чную Богородицу, приидите, воспоим, вернии, зову́ще: ра́дуйся, ми́ра Влады́чице Богора́дованная.

Тя купина́ неопали́мая прообрази́, одушевле́нну купину́ жи́ву и ды́шущу: огнь бо Божества́ заче́нши, пребыла́ еси́ неопа́льна, Богороди́тельнице, сего́ ра́ди негаси́маго мя огня́ исхити́.

Дави́д богооте́ц и Твой пра́отец, нарица́ет Тя Дщерь и Цари́цу, мы же Де́ву и Богоро́дицу, Чи́стая, вселе́нныя стра́нное слы́шание и ве́лия похвале́ чту́щим Тя.

Обреты́й Тя а́нгелов чисте́йшу, сни́де во утро́бу Твою́ во све́те Живы́й непристу́пнем, Богоро́дице, и Челове́к яви́ся, из Тебе́ воплоща́емь, во двою́ естеству́ познава́емый.