Ирмос: Услы́ша проро́к прише́ствие Твое́, Го́споди, и убоя́ся, я́ко хо́щеши от Де́вы роди́тися и челове́ком яви́тися, и глаго́лаше: «Услы́шах слух Твой и убоя́хся, сла́ва си́ле Твое́й, Го́споди».

Возлюби́х настоя́щая, плоть, мир и я́же в ми́ре сластна́я, сла́ву и мзду, оба́че бу́дущих ника́коже попеко́хся; сего́ ра́ди го́рния сла́вы и любве́ Бо́жия отпадо́х, окая́нный.

Две́ре Боже́ственныя сла́вы, две́ри отве́рзи ми покая́ния, и к све́ту незаходи́му введи́ Сы́на и Зижди́теля Твоего́, Всепе́тая, страстей изыма́ющи тьмы и ле́ности мглу разоря́ющи.

Недрема́ну свещу́ души́ моея́ соблюди́, да не я́ко безъелейну угаси́ши, и затвори́тся мне неве́стника дверь, но ми́лости две́ри отве́рзи и предста́ни ми в час исхо́да моего́.

Низложи́ враги́ моя́, побори́ непра́ведно мя борющия, да уве́дят чий раб есмь, в ко́е предста́тельство напису́юся, и спаси́ воспева́юща Тя, Всепе́тая.