Ирмос: Боже́ственное сие́ и всечестно́е соверша́юще пра́зднество, богому́дрии, Богома́тере, прииди́те, рука́ми воспле́щим, от Нея́ ро́ждшагося Бо́га сла́вим.

Ра́дуйся, неора́нная ни́во; ра́дуйся, невозде́ланная лоза́; ра́дуйся, раю́; ра́дуйся, исто́чниче неоску́дный; ра́дуйся, Боже́ственная ста́мно Ма́нны; ра́дуйся, Богоневе́сто.

Ра́дуйся, приста́нище невла́емое; ра́дуйся, бори́мых забра́ло; ра́дуйся, тверды́не; ра́дуйся, па́дающих исправле́ние; ра́дуйся, Вы́шняго Ма́ти; ра́дуйся, Всенепоро́чная.

Ра́дуйся, ма́слина плодови́тая; ра́дуйся, Голуби́це мировожделе́нная; ра́дуйся, Ма́ти Де́во; ра́дуйся, Мари́е Нескве́рная; ра́дуйся, Пресвята́я Отрокови́це; ра́дуйся, Всепе́тая.

Ра́дуйся, клеще́ Боже́ственнаго Угля; ра́дуйся, всезлато́е кади́ло; ра́дуйся, ди́вное благоуха́ние; ра́дуйся, Ду́ха прия́телище; ра́дуйся, Сло́ва черто́же; ра́дуйся, Любоблага́я.

Седален, глас четвертый. Подобен:Яви́лся еси́:

Ра́дуйся, престо́ле о́гненный Царе́в и све́щниче све́та Бо́жия всезлаты́й, ду́ши и помышле́ния просвеща́яй воспева́ющих Тя, Отрокови́це Всепе́тая.