Ирмос: Пожру́ Ти со гла́сом хвале́ния, Го́споди, Це́рковь вопие́т Ти, от бесо́вския кро́ве очи́щшися, ра́ди ми́лости от ребр Твоих исте́кшею кро́вию.

Кре́пость моя́ Сама́ еси́, Нескве́рная Влады́чице, в обре́тших мя неча́янных ско́рбех, и вопию́ Ти, я́ко ве́лий есть всеси́льный покро́в Твой рабу́ Твоему́.

Уврачу́й души́ моея́ я́звы, заступи́ мя, Де́во, и изба́ви оклевета́ния, наве́та и непра́ведна стремле́ния раба́ Твоего́.

Сокруши́ я́же на мя моле́бника Твоего́, при́сно совеща́ющия непра́ведно, не оста́ви поги́бнути мя, вся бо возмо́жна Ти, я́ко Богома́тери.

Успи́ души́ моея́ свире́пое волне́ние, я́ко мно́жество прегреше́ний, искуше́ний же и скорбе́й возста́ша на мя, но Сама́ спаси́ мя, Влады́чице.

Седален, глас четвертый. Подобен:Ско́ро предвари́:

Воспева́ем Тя, Богоневе́сто, Ма́ти Христа́ Бо́га, сла́вяще рождество́ Твое́ непости́жное, и́мже изба́вихомся пре́лести диа́воли и вся́ческих бед, Влады́чице Богоро́дице, и ве́рою вопие́м: поми́луй ста́до Твое́, Де́во Всепе́тая.