Ирмос: Согреши́хом, беззако́нновахом, непра́вдовахом пред Тобо́ю: ниже́ соблюдо́хом, ниже́ сотвори́хом, я́коже запове́дал еси́ нам; но не преда́ждь нас до конца́, отце́в Бо́же.

Прогне́вах, преогорчи́х Долготерпели́ваго и Соде́теля моего́, Иже дре́вле созда́ мя от земли́ и от не су́щих во е́же бы́ти приведе́, но уми́лостиви ми Сего́, Де́во, ма́терними Твоими проше́нии.

О, Влады́чице, отве́рзшая честна́я рая́ врата́, сия́ и мне затворе́ны де́лы безме́стными и́хже соде́ях, отве́рзши, спаси́ мя и того́ жи́теля покажи́.

Уми́лостиви Сы́на Твоего́, Го́спода Бо́га и Благоде́теля на́шего, Влады́чице Всесвята́я, е́же изба́вит ми ся бед и скорбе́й, и све́тлости святы́х и сла́вы ве́чныя улучи́ти.

Освяти́ и светонаста́ви се́рдце мое́, Богома́ти, изсуши́ страсте́й его́ то́ки, окропи́ водо́ю Боже́ственнаго моле́ния Твоего́, и сподо́би приноси́ти Тебе́ песнь благоприя́тну душе́ю чи́стою.