Ирмос: Пещь о́троцы огнепа́льну дре́вле росоточа́щу показа́ша, Еди́наго Бо́га воспева́юще и глаго́люще: «Превозноси́мый отце́в Бо́же и препросла́влен».

О, та́инства ужа́сна и стра́нна! О, нове́йшаго слы́шания! Яко Бог Жены́ Сын бысть де́лом, не о́бразом, да положе́нием сы́на Бо́жия сотвори́т мя.

Кто ви́де или́ слы́ша вся́ко когда́ Де́ву Отрокови́цу непра́здну, без му́жа заче́ншую и ро́ждшую? В Тебе́ еди́ней, Влады́чице, неслы́шанное услы́шася и соде́яся.

Высоту́ и глубину́, долготу́ же и широту́ тва́ри ви́димыя всея́ рождества́ Твоего́, Влады́чице, вели́чие превосхо́дит: тоя́ бо Творца́ па́че сло́ва воплоти́ла еси́.

Горо́ вели́кая гор святы́х, па́че сил безпло́тных святы́нею превознесе́на, и́же в гора́ па́губней заблужда́юща, взыщи́, Чи́стая, и спаси́ мя.