Ирмос: Образу злато́му на по́ле Деи́ре служи́му, трие́ Твои о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: «Благослове́н еси́, Бо́же оте́ц на́ших».

Гедео́ново руно́ иногда́ е́же на Тя Бо́га Сло́ва Боже́ственное предживописа́ сни́тие, зане́ я́ко ро́су зача́тие, Нетле́нная Де́во, прия́ла еси́; те́мже вси зове́м: благослове́н Плод чре́ва Твоего́, Чи́стая.

Но́вая и ужа́сная, ве́рная и и́стинная та́инства Твоя́, Мари́е, Бо́га на́шего Мати, я́ко в Тебе́ Богу́ вси примири́хомся и Влады́це, и со а́нгелы ку́пно пое́м: благослове́н Плод чре́ва Твоего́, Чи́стая.

Пре́жде Гедео́н, провозвеству́яй яве Боже́ственное Твое́ рождество́, окри́н[31]но́сит испо́лнь воды́, я́же есть руна́ исцеже́ние, все бо в Тя Божество́ всели́ся; благослове́н Плод чре́ва Твоего́, Чи́стая.

Ро́ждшая Бога и Спа́са всех, Отрокови́це, па́дших была́ еси́ исправле́ние, гре́шников обновле́ние, ненаде́жных наде́жда и по́мощь пою́щих: благослове́н Плод чре́ва Твоего́, Чи́стая.