Ирмос: Бо́га челове́ком невозмо́жно ви́дети, на Него́же не сме́ют чи́ни а́нгельстии взира́ти; Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя ублажа́ем.

Яко раб вне́шняя очеса́ возво́дяй на ру́це госпо́дий своих, Всепе́тая, си́це и аз очеса́ я́же вне и внутрь к Тебе́ возвожу́, Влады́чице моя́, Госпоже́ и жизнь, да уще́дриши мя.

Богора́дованная Отрокови́це, на мое́ при́зри ми́лостивно смире́ние, жа́лостное сие́ и после́днее моле́ние прие́млющи, и му́чащаго огня́ ве́чнаго изба́вити мя потщи́ся.

Яже ме́ртвых и живы́х Бо́га ро́ждшая, мертвотво́рных, мя, Де́во, боле́зней изба́ви, здра́вие и живо́т пода́ждь; си́лою же препоясу́ющи с высоты́, свободи́ мя неду́жна и кре́постию изнемо́гша.

Храм Божий живый и одушевленный и слове́сное пребыва́лище ве́дый Тя, прибега́я к хра́му Твоему́ ве́рою те́плою, ны́не пре́жде не́же отыти́, молю́ся: осла́би ми, да почи́ю, воспева́я вели́чествия Твоя́.

Стихиры, глас шестый. Подобны:Тридне́вен воскре́сл еси́:

Ра́дуйся, апо́столов честносло́вие, а́нгелов весе́лие све́тлое; ра́дуйся, вселе́нныя похвало́, Нескве́рная Де́во, и ве́рных удобре́ние.

Ра́дуйся, горо́ несеко́мая, Де́во Всенепорочная, ю́же прови́де проро́к Дании́л, от нея́же отсече́ся ка́мень, и́долы сокруши́вый, Христо́с еди́н Царь всех.

Ра́дуйся, черто́же всесве́тлый; ра́дуйся, одушевле́нная трапе́зо Хле́ба Боже́ственнаго, в не́йже предлежи́т Христо́с; ра́дуйся, благоче́стия добро́то, Богоро́дице; ра́дуйся, покро́ве душ на́ших.

Всепе́тая, низложи́ враго́в скверноуби́йц бровь, и скорбь люде́й Твоих в ра́дость обрати́, Де́во, и кре́пость пода́ждь, я́ко да воспева́ем Тя спасе́ни.