Ирмос: Внача́ле небеса́ всеси́льным сло́вом Твоим утвержде́й, Го́споди Спа́се, и вседе́тельным и Бо́жиим Ду́хом всю си́лу их, на недви́жимем мя ка́мени испове́дания Твоего́ утверди́.

Отягче́н лютым бре́менем греха́, я́ко пре́жде до́лу сляче́нна, и аз Ти припа́даю, Всенепоро́чная: я́ко о́ну Сын Твой от уз ле́тных[84], та́ко Ты мя разреши́ от согреше́ний моих.

Сле́зы, иста́яние, плач, я́же суть покая́ния цве́ти, плод присноцвету́щ ника́коже, Де́во, яви́ша во мне, но неча́яние, отку́дуже бу́ря напа́дши зе́льна, сия́ увяде́, Богоневе́сто.

Ио́сиф удержа́выйся госпожи́ невозде́ржныя беззако́нных дре́вле сласте́й, све́тлый Еги́пта бысть царь, аз же теле́сным мно́гим страсте́м повину́вся безу́мно, досе́ле под грехо́м ца́рствуюся.

Не преста́ни, Блага́я, о ми́ре моли́ти, е́же изба́витися вся́ческаго преще́ния и настоя́щаго ны́не озлобле́ния, ва́рварския туги́ и наше́ствия, рабо́ты го́рькия и про́чих лю́тых всем почита́ющим Тя.