Ирмос: Впещь о́гненную ко отроко́м евре́йским снизше́дшаго и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся ве́ки.

Зло́бами враг ловя́й вта́йне, прельща́ет мя, помышле́ньми низвлача́ к сла́сти стремни́нам, но Ты, Богоро́дице, огради́ мя, еди́но предста́тельство оби́димых.

Хотя́й покаря́юся врагу́, помысло́в прираже́ньми нале́гшу, но некре́пко сего́ кова́рство, Блага́я, всу́е шата́ющася покажи́, снабдева́ющи мя, раба́ Твоего́.

Пред Тобо́ю излию́ в пла́чи и воздыха́нии моли́тву мою́, души́ моея́ скорбь возвещу́ Ти, Чи́стая; се бо гное́нием скорбе́й иждива́юся, не ви́дя Тебе́, све́та моего́.

Посто́м подвиза́йся, душе́, бде́нием, пла́чем, псалмопе́нием и в моле́ниих всено́щных стоя́нием невеще́ственным, те́мже Бог тя очи́стит Богоро́дицы богоприя́тными моли́твами.