Ирмос: На ка́мени мя ве́ры утверди́в, разшири́л еси́ уста́ моя́ на враги́ моя́, возвесели́ бо ся дух мой, внегда́ пе́ти: несть свят, я́коже Бог наш, и несть пра́веден па́че Тебе́, Го́споди.

Мглу страсте́й моих и мрак отгони́ заря́ми моле́ний Твоих, и просвети́ мя, Всечи́стая; родила́ бо еси́ возсия́вша пре́жде денни́цы Христа́, от Со́лнца Со́лнце незаходи́мо, Влады́чице.

Попаля́ющее грехи́ и страсти души́ моея́ ору́жие, Де́во, бу́ди, и покажи́ мя я́ко раи́ други́й ненаве́тен, и от Тебе́ соблюда́емь, и принося́й цветы́ Ду́ха.

Возста́вила еси́ Твоим рождество́м ски́нию па́дшу и сокруше́нну Дави́да, пра́отца Твоего́, Богоро́дице; темже и мя возста́ви, раба́ Твоего́, страстьми́ сокруше́на и прегреше́нии.

Неду́гующу бесо́в наве́тами и ле́ностию ду́шу мою́ уврачу́й, и сле́зы покая́ния да́ждь се́рдцу моему́, и Влады́ки моего́ всади́ в него́ страх Твой, Всенепоро́чная.