Ирмос: Отроки благочестивыя в пещи́ Рождество́ Богоро́дичо спасло́ есть; тогда́ у́бо образу́емое, ны́не же де́йствуемое, вселе́нную всю воздвиза́ет пе́ти Тебе́: Го́спода по́йте дела́ и превозноси́те Его́ во вся ве́ки.

Боже́ственный я́ко су́щи свети́льник огненося́й, благода́тей све́тлости всем испусти́, ве́рою Ти вопию́щим глас а́нгельск, Всенепоро́чная, «ра́дуйся», Еюже озари́ся и обнови́ся род челове́ческии́.

Зари́ честны́я и трисо́лнечныя пресве́тлое селе́ние су́щи, Боже́ственное и спаси́тельное всем возсия́ла еси́ просвеще́ние, ве́рою вопию́щим Ти, Еюже озари́ся и обнови́ся род челове́ческии́.

Труба́ проро́ча та́йно прообража́ше Тя дре́вле дверь непрохо́дну, го́ру же и пала́ту, хра́мы Ду́ха явля́ющу «ра́дуйся» вопию́щих Ти, Еюже озари́ся и обнови́ся род челове́ческии́.

Расто́ргни пото́ки страсте́й, се́рдце смире́нное мое́ потопля́ющия и к Боже́ственному приста́нищу мя устреми́, да пою́ Тя всегда́, Препе́тую, и «ра́дуйся» ве́рою вопию́ Ти, Еюже озари́ся и обнови́ся род челове́ческии́.