Ирмос: Иса́йе, лику́й: Де́ва име́ во чре́ве и роди́ Сы́на Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Богома́ти Пречи́стая, предста́тельство христиа́н, лю́ди Твоя́ спаса́й от вся́каго преще́ния, от плене́ния ва́рварска, от гне́ва, я́рости и вся́каго осужде́ния.

Благогове́йне пое́м хвале́бныя Тебе́ пе́сни, избавля́еми при́сно боле́зней лю́тых Боже́ственными Твоими мольба́ми; сего́ ра́ди и ны́не

взыва́ем ве́рно: исцели́, Влады́чице, ду́ши на́ша и телеса́.

Всесвята́я Влады́чице, моли́ Тро́ицу покланя́емую, от Нея́же безстра́стно Еди́наго пло́тию нам родила́ еси́, умири́ти вся я́же на земли́ и разреше́ние согреше́ний пою́щим Тя дарова́ти.

Воздыха́ний моли́твенник Твоих не отри́ни, Всечи́стая, но при́зри на нас, в ско́рбех су́щих, плач на весе́лие премени́ и печа́ль на ра́дование в пе́снех почита́ющим Тя.

Стихиры, глас пятый. Подобны:Ра́дуйся, по́стников:

Ра́дуйся, мы́сленный киво́те, и́мже мы челове́цы пото́па изба́вихомся и бу́ри грехо́вныя; ра́дуйся, Богома́ти Честна́я, све́тлое ми́рови удобре́ние и ве́ры крепча́йшее воста́ние. Ра́дуйся, свети́льниче светоза́рный и пресве́тлый, нестерпи́маго во чре́ве Твое́м и всепресу́щнаго Све́та безсе́менно Поноси́вшая. Ра́дуйся, кля́твы разреше́ние и благослове́ния возда́ние; Христа́, ра́дуйся, Ма́ти, подаю́щаго ми́рови ве́лию ми́лость.

Ра́дуйся, би́сер Христа́ от мо́лнии Божества́ заче́ншая, вся тьмо́ю неве́дения и глубино́ю лю́тых объя́тыя еди́на к све́ту ра́зума наста́вльшая, Препе́тая Влады́чице. Ра́дуйся, о́блаче светоза́рный и пресве́тлый; ра́дуйся, апо́столов похвало́ и пропове́дание, виде́ние многослову́щее и изря́дное слы́шание; ра́дуйся, прия́телище Творца́ и чи́стое Бо́га жили́ще, Его́же моли́ душа́м на́шим дарова́тися ве́лиеи́ ми́лости.

Ра́дуйся, восто́че у́мный, Яже Христа́ от ложе́сн Возсия́вшая, исполня́ющаго вселе́нную све́та неизрече́нна; ра́дуйся, Чи́стая, без пло́тных ра́дование; ра́дуйся, Агнца Бо́жия ро́ждшая, взе́мшаго грехи́ на́ша, и ми́ра всего́ Пита́теля и Прави́теля отдойвшая и на объя́тиих Твоих удержа́вшая, еди́на Нетле́нная и Нескве́рная; ра́дуйся, Свята́я святы́х, Пресвята́го Го́спода при́сно моля́щи не оста́ви, Владычице, о рабе́х Твоих.

Обрати́ плач в ра́дость, на благохвале́ние се́тование преложи́, рыда́ние же на весе́лие и ра́дование ны́не, Богоро́дице еди́на Всеблагослове́нная, и́бо умно́жишася ненави́дящии раба́ Твоего́ и и́щущии ду́шу погуби́ти мою, безсту́дни су́ще, кровоя́дцы и льсти́вии, всу́е превознося́щеся, люте рыка́юще, я́коже пси неи́стовии; и́хже зло́бы мя изба́ви, живо́т да́рующи, спасе́ние и ве́лию ми́лость.