Ирмос: Су́шу глубороди́тельную зе́млю со́лнце наше́ствова иногда́; я́ко стена́ бо, огусте́ обапо́лы вода́ лю́дем пешомореходя́щим и богоуго́дно пою́щим: «Поим Го́сподеви, сла́вно бо просла́вися».

Со скорбьми́ бра́тися в житии́ добре́йшее есть к по́льзе душе́вней, сего́ ра́ди, Богоро́дице, в ско́рбех су́щии, при́сно Тя Помо́щницу нарица́ем, непреста́нно зову́ще: Влады́чице, не пре́зри моле́ния раб Твоих.

Ко́рень зол всех в житии́ сребролю́бное тща́ние есть, его́же приобре́тение яви́ся Иу́дино удавле́ние; те́мже Христу́ рабо́тати чи́сте хотя́щии, отве́ржим сие́ дале́че Богома́терию.

Со́лнце я́ко ино́е на тве́рди показа́ся нестяжа́тельно житие́, доброде́телей круг многообра́зный крася́щее; те́мже страсте́й тьмо́ю при́сно воспяща́еми, сего́ светозаре́нием к Де́ве притеце́м.

Ны́не душепа́губных мя и неподо́бных помысло́в бу́ря пости́же, и к про́пасти влече́т и глубине́ поги́бельней. Ты у́бо бу́ди ми Ко́рмчия, Всесвята́я, и ко приста́нищу Боже́ственному упра́ви и блаже́нному благосла́вию.