Ирмос: Просвети́вый сия́нием прише́ствия Твоего́, Христе́, и освети́вый Кресто́м Твоим ми́ра концы́, сердца́ просвети́ све́том Твоего́ богоразу́мия правосла́вно поющих Тя.

Исцели́ души́ моея́ боле́зни, Пречи́стая: родила́ бо еси́ боле́зни на́ша Исце́льшаго страда́нии Его́ спаси́тельными и всечестны́ми, да ве́рою велича́ю Тя.

Оскве́рншуюся окая́нную ду́шу мою́ страстьми́, иссо́пом Боже́ственнаго моле́ния Твоего́ очи́сти, Нескве́рная, подаю́щи спасе́ния той оде́жду пресве́тлу.

Тя гото́вую ко е́же спаса́ти по́мощь стяжа́х, сего́ ра́ди Ти припа́даю и вопию́ со слеза́ми: Богоро́дице, изба́ви мя стрел чужда́го и бу́дущаго муче́ния.

Ты кре́пость моя́, Ты и похвала́ и весе́лие и храни́ло мое́, заступле́ние же и прибе́жище и необори́мо предста́тельство, сего́ ра́ди спаса́й раба́ Твоего́.