Ирмос: Тебе́ у́мную, Богоро́дице, пещь разсмотря́ем вернии: я́коже бо о́троки спасе́ три Превозноси́мый, мир обнови́, во чре́ве Твое́м всеце́л, хва́льный отце́в Бог и препросла́влен.

Ве́рою мно́гою и любо́вию прихожду́ к Боже́ственному покро́ву Твоему́, Чи́стая; Ты мне бу́ди прибе́жище, Ты и очисти́лище, Ты мя изба́ви скорбе́й, напа́стей и искуше́ний, Богоро́дице, неду́гов и озлобле́ний.

Восто́че Со́лнца, Влады́чице, у́мнаго, я́ко Ми́лостивая, заре́ю всесве́тлою Боже́ственнаго моле́ния Твоего́ просвети́ покая́ния ми зарю, изгоня́щи мра́чную мглу́ страсте́й и грехопаде́ний моих.

Изба́ви ны, благохва́лящия Тя, от наси́льства врага́, и́щуща безу́мно погубле́ния на́шего, и сего́ отщети́ лукавство́, Всенепоро́чная, и ухищре́ние все его́ си́лою Твое́ю помрача́ющи.

Престо́л Бо́жий и черто́г одушевле́н, Богороди́тельнице, уве́девше ве́рнии Тя воистинну, ве́рою вопие́м: спаси́ рабы́ Твоя́ от всех обстоя́ний, я́ко да при́сно благословля́ем, Чи́стая, и покланя́емся Тебе́.