Ирмос: Христо́с ражда́ется, сла́вите; Христо́с с небе́с, сря́щите; Христо́с на земли́, возноси́теся. По́йте Го́сподеви, вся земля́, и весе́лием воспо́йте, лю́дие, я́ко просла́вися.

Христиа́н прибе́жище, па́дающих исправле́ние, Всенепоро́чная, согреша́ющих очище́ние, изба́ви мя осужде́ния стра́шнаго и огня́ негаси́маго, живо́т ве́чный подаю́щи мне.

Неча́янием содержу́ся, мно́жество помышля́я прегреше́ний и Судии́ изрече́ние; Влады́чице Богоро́дице, Ты мне бу́ди Боже́ственная Хода́таица, умиря́ющи Его́ благоутро́бием Твоим.

Де́во еди́на Всепе́тая, Де́во Бо́га вопло́щшая, Де́во всем Хода́таице жи́зни ве́чныя, возсия́и́ ми свет покая́ния, разреша́ющи мрак прегреше́ний моих.

Се, к Тебе́ ны́не прибего́х, кро́ву моему́ и Боже́ственному заступле́нию: утро́бы ми благода́ти Твоея́ незатворе́ны покажи́, не прогне́ваи́ся, ниже́ пре́зри, не оста́ви мене́, Де́во, ги́бнуща.