Ирмос: Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся: к Тебе́ бо возопи́х, и услы́ши мя, Бо́же спасе́ния моего́.

Быша псало́мски беззако́ния моя́, Влады́чице, я́ко бре́мя тя́жкое, тяготе́ющее на мне, и души́ я́звы за безу́мие мое́ возсмерде́ша и согни́ша*.

По до́лгу к хра́му свяще́нному Твоему́ при теко́х, и я́ко моле́бник плаче́вный предстою, Влады́чице: сле́зы моя́ приими́, я́ко вдови́чи иногда́ ле́пты Христо́с Госпо́дь.

О, ка́ко но́сит земля́ самоосужде́ннаго, па́че всех челове́к блу́дно пожи́вша, и не пожре́т мя! Недоуме́ю и трепе́щу; но Ты еси́ спаса́ющая.

Угаси́, Блага́я, ороше́нием ми́лости Твоея́ стре́лы о́гненны, льсти́вно дви́жимыя в нощи́ и во дни от врага́, борю́ща мя.

Седален, глас осьмый. Подобен:Прему́дрость и Сло́во:

Многосве́тлая колесни́це Бо́жия, Све́та Боже́ственна све́щниче златови́дный, Нескве́рная и Пренепоро́чная Влады́чице, те́мную ду́шу мою́, осле́пшую страстьми́, безстра́стия просвети́ заре́ю, молю́ся, и оскверне́нное се́рдце мое́ то́ками омы́й умиле́ния, покая́ния же слеза́ми, да любо́вию зову́ Ти: моли́ся Сы́ну Твоему́ и Бо́гу согреше́ний да́ти ми оставле́ние; Тя бо и́мам наде́жду раб Твой.