Ирмос: Превозноси́мый отце́в Госпо́дь пла́мень угаси́, о́троки ороси́, согла́сно пою́щия: «Бо́же, благослове́н еси́».

Еже к пра́отцу Авраа́му обеща́ние Бог сконча́, Сын Твой быв, и се́мя его́ язы́ки благословля́яй, Благослове́нная.

Дще́ри вся превозшла́ еси́, Всечестна́я: мно́гия у́бо от них сил дарова́ния сотвори́ша, рождество́ же Твое́ сла́вою сих превзы́де.

Ка́плют, Всепе́тая, сми́рну, тле́ние уставля́ющу, всечестна́я уста́ Твоя́, Бо́га лобза́вшая, Его́же родила́ еси́ я́ко Младе́нца, и почита́еши я́ко Влады́ку.

Яви́лася еси́ смеше́ние челове́ческо обожи́вшая Боже́ственным рождество́м Твоим, Мари́е Всенепоро́чная; те́мже Тя по до́лгу, ве́рнии, славосло́вим.