Ирмос: Светоно́сный о́блак, во́ньже всех Влады́ка я́ко дождь с небесе́ на руно́ сни́де, и воплоти́ся нас ра́ди, быв Челове́к, Безнача́льный, велича́ем вси, я́ко Ма́терь Бо́га на́шего Чи́стую.

Бо́га ви́дети сподо́бися Авраа́м, страннолю́бием, я́ко бе долг[24], подвиза́вся, аз же ску́постию странноненави́стие возыме́вый, досто́йно в гее́нну отве́ржен есмь, но Ты, Богоро́дице, изми́ мя та́мошняго муче́ния.

Струя́ми блудни́ца сле́зными Христо́вы стопы́ нескве́рныя жа́лостивно омы́вши, грехо́в разреше́ние обре́те ско́рое, аз же, Чи́стая, припа́дая Ти, всем се́рдцем моим стеню и страсте́й прошу́ изба́вити мя.

Ум, ду́шу и те́ло и про́чая моя́ чу́вства Тебе́ возлага́ю, Всенепоро́чная: сия́ сохрани́ неврежде́ны от стрел лука́ваго, и даждь умиле́ние е́же пла́катися приклю́чшихся ми страсте́й, леня́щуся и живу́щу безпе́чно.

От ле́ности в забве́ние, в безстра́шие от забве́ния, от безстра́шия во глубину́ впады́й греха́, к Тебе́, Богома́ти, взыва́ю: ру́ку мне простри́ и спаси́ мя, я́ко спасе́ Петра́ Сын Твой от мо́ря го́рька.

Стихиры, глас первы, подобны:Прехва́льнии му́ченицы:

Ра́дуйся, колесни́це Бо́жия; ра́дуйся, всех Цари́це; ра́дуйся, Влады́чице тва́ри; ра́дуйся, лозо́, поро́ждшая Гро́зд, вино́ иска́паяй, веселя́щее ве́рою пою́щия, велича́ющия и чту́щия Тя, Всепе́тая, я́ко Ма́терь Христа́ Бо́га на́шего.

Ра́дуйся, Боже́ственное селе́ние Христо́во; ра́дуйся, Преблагослове́нная; ра́дуйся, всечу́дная Влады́чице; ра́дуйся, Яже непоро́чнаго Тельца́ ро́ждшая, Юнице неневе́стная, Христа́ Жизнода́вца и Го́спода, Его́же ны́не моли́ ма́терними Твоими мольба́ми изба́вити от бед рабы́ Твоя́.

Ра́дуйся, кни́го одушевле́нная Бо́жия, Сло́во Всесвято́е нося́щая написа́нно; ра́дуйся, неопа́льная купино́; ра́дуйся, Де́во, всесве́тлый о́блаче, Христа́, у́мнаго су́щне[25]Со́лнца возсия́вшая человеком; ра́дуйся, Нескверная, злополу́чным готовая помоще.

Неду́гующую люте лука́внеи́шими страстьми́ ду́шу мою, Всепетая, исцели, я́ко Врача и Спаса всех рождшая, вся́ку я́зю врачу́юща, диа́вольское уя́звльша злоу́мие и смерти нас изме́ншаго.