Ирмос: Воистинну Богоро́дицу Тя испове́дуем, спасе́нии Тобо́ю, Де́во Чи́стая, с безпло́тными ли́ки Тя велича́юще.

Ка́плю ми́лости мне, Богома́ти, иска́пай, и неве́жствия мрак отжени́; Ты бо еди́на родила́ еси́ Избавле́ние челове́ков.

Ти́ною страсте́й спокрове́на мя и ка́лом сласте́й оскверне́на, я́ко Блага́я моя́ Предста́тельница, очи́сти.

Креста́ всеору́жием утверди́ ве́ру христолюби́вых царе́й, Человеколюбче, Рождшия Тя мольба́ми, я́ко Многоми́лостив.

Тру́са и гла́да, огня́, плене́ния и междоусо́бныя бра́ни изба́ви почита́ющих Тя, Богора́дованная.

Стихиры, глас осьмый. Подобны:Что вас нарече́м:

Ра́дуйся, Присноде́во Влады́чице, Яже Бла́гаго естество́м, Блага́я, подража́ющая, и от прису́щих Его́, я́ко пе́рвым и наро́читым, богатя́щаяся ма́терски благосты́нею[95]; те́мже ублажа́еши пою́щия Тя, я́ко состра́стна и человеколюбна, и путево́ждствуеши я́ к наслажде́нию ве́чных благи́х.

Ра́дуйся, бога́тное жили́ще Бо́жие, высо́кии́ и светоза́рный хра́ме Царе́в, нерукоплете́нный неве́стниче, златопорфи́рный черто́же, ло́жнице благово́нная и всечестна́я, пала́то благоуха́нная и камнеблиста́ющая; ра́дуйся, престо́ле всезлаты́й, углено́сная же клеще́ и одушевле́нная Огня́, Богоро́дице, не веще́ственнаго.

Ра́дуйся, Мариа́м господоимени́тая, ми́ру всему́ Госпоже́ Всечестна́я, я́ко Го́спода господе́й поро́ждшая, Присноде́ва госпо́дственне су́щи, чистоты́ всеиме́нием пресоверше́нным госпо́дски обога́щшися ума́, души́ же и телесе́, Ейже вся́ческая, я́ко Госпоже́, рабо́тна суть.

Даждь ми житие́ мое́ провожда́ти всех ра́ди честны́х Твоего́ Сы́на блаже́нств, е́же нище́тствовати умо́м, пла́кати, укроща́тися, алка́ти и жа́ждати с жела́нием пра́вды, чи́сту бы́ти и ми́лостиву и миротво́рцу, изгоня́тися пра́вды ра́ди и ра́доватися, о сих веселя́ся.