Ирмос: Бе́здна после́дняя грехо́в обы́де мя, и исчеза́ет дух мой; но простры́й, Влады́ко, высо́кую Твою́ мы́шцу, я́ко Петра́ мя, Упра́вителю, спаси́.

«Ра́дуйся» Ти Гаврии́лово усе́рдно вси лю́дие Твои, весе́лящеся, зове́м, Госпоже́ Богоро́дице; ра́дуйся, Чи́стая и многосве́тлая, Яже Со́лнце ве́рным возсия́вшая.

«Ра́дуйся» Ти вопие́м прера́достно Всенепоро́чнеи́ и Ма́тери Бо́га на́шего; ра́дуйся, купино́ неопальная и село́ невозде́ланно, небе́сный изра́стшее Клас.

«Ра́дуйся» Ти, Цари́це, ве́рнии единомы́сленно и безмяте́жно взыва́ем; ра́дуйся, ле́ствице одушевле́нная, челове́ки возводя́щая к небеси́ и нетле́нному благосла́вию.

Вси е́же «ра́дуйся» Ти, яко присноживо́тную Си́лу ро́ждшеи́, ра́достно вопие́м, Богома́ти; ра́дуйся, черто́же всесве́тлый; ра́дуйся, всемо́щная тверды́не вселе́нныя.

Седален, глас третий. Подобен:Красне́йшую:

Ра́дуйся, простра́нная Бо́жия пала́то; ра́дуйся, многосве́тлое Христо́во оби́телище, златоплете́нный черто́же и порфиропо́стланный о́дре, ло́жнице огнезра́чная, не́бо превысоча́йшее, одушевле́нный раю́, слове́сное пребыва́ние, пресла́вный престо́ле Влады́чень; ра́дуйся, Богоро́дице Мари́е.