Ирмос: Образ чи́стаго рождества́ Твоего́, огнепали́мая купина́ показа́ неопа́льная; и ны́не на нас напа́стей свире́пеющую угаси́ти мо́лимся пещь, да Тя, Богоро́дице, непреста́нно велича́ем.

Яви́лася еси́ заря́ чистоты́, всю тварь превосходя́щи, Всенепоро́чная, но приими́ мя, скве́рнами омрачи́вша сласте́й па́че вся́каго челове́ка ду́шу и те́ло, и Твоими мольба́ми очи́сти.

Стезя́ми Боже́ственными покая́ния отводя́щи, ду́шу мою́ возврати́ от пути́, вводяща́го в смерть и па́губу и́стинно ве́чную, Мари́е Богороди́тельнице, гре́шников очище́ние.

Вску́ю мя отри́нула еси́, Свет оче́й моих и ра́дование се́рдца моего́, и искуше́ния мя обыдо́ша? Но уще́дри и спаси́ от всех оскорбля́ющих, ско́рбных утеше́ние.

Песнь благогове́йно прино́сим безсе́менному Твоему́ Рождеству́ Тобо́ю, Влады́чице всех Чисте́йшая, и Тебе́ непреста́нно сла́вим, моля́ще изба́вити му́ки правосла́вно Тя чту́щих и ве́рою правосла́вною почеству́ющих.

Стихиры, глас первый. Подобны:Небе́сных чино́в:

Ра́дуйся, горо́ ту́чная и богопрохо́дная; ра́дуйся, а́нгелов многослову́щее чу́до, кре́посте му́чеников; ра́дуйся, чи́стая иере́ов красото́ и ни́щих безбе́дное сокро́вище; ра́дуйся, сла́во чту́щих Тя.

Ра́дуйся, ца́рская держа́во и сто́лпе неколеби́мь; ра́дуйся, ве́рных сла́во, Богоро́дице Де́во, исправле́ние па́дающих; ра́дуйся, Чи́стая, диа́вола низложе́ние и неве́жствия вся́каго, зане́ Христа́, упова́ние всех родила́ еси́.

Ра́дуйся, небе́снаго кру́га звездо́ светле́йшая, связу́ющая вся, я́ко зве́зды, ча́да Твоя́ вку́пе, правосла́вныя христиа́ны, и я́ко Ма́ти любе́зная покрыва́ющи и гре́ющи сих, и небе́сных сподобля́ющи оби́телеи́.

Кто пове́сть, Де́во, Твоя́ чудеса́? Его́же не мо́гут зре́ти а́нгелов чи́ни, носи́ла еси́ я́ко престо́л херуви́мск. Сего́ испроси́, Пречи́стая, в бу́дущий стра́шный день всем изба́витися му́ки.