Ирмос: Возопи́ к Тебе́, ви́дев ста́рец очи́ма спасе́ние, е́же лю́дем прии́де от Бо́га: «Христе́, Ты Бог мой».

Ника́коже страшу́ся, ника́коже трепе́щу Та́ин причаще́ния, сего́ ра́ди, Де́во, немощству́ю ча́сто согреша́яй.

Простра́нное житие́ и веще́ствен нрав, Богоро́дице, прохожду́, сего́ ра́ди Христо́вых чужд есмь благода́тей.

Жи́ти не хощу́, стеснева́емь мона́хов зако́нми, Влады́чице, и в широ́к путь теку́ поги́бели.

Кре́пость моя́ вся и наде́жда моя́, свет и живо́т и утеше́ние Ты еси́, Де́во, сего́ ра́ди к Тебе́ прибего́х.

Седален, глас третий. Подобен:Де́ва дне́сь:

От те́плыя ве́ры Тебе́ вопию́, Богоро́дице, недосто́йными усты́ и нечи́стым се́рдцем, спаси́ мя, потопля́ема грехи́, уще́дри неча́янием умерщвле́на, да зову́ Ти спаса́емь: ра́дуйся, Де́во, христиа́н похвало́.