Ирмос: Иса́йе, лику́й: Де́ва име́ во чре́ве и роди́ Сына Емману́ила, Бо́га же и Челове́ка, Восто́к и́мя Ему́; Его́же велича́юще, Де́ву ублажа́ем.

Умное чу́вство души́ мое́й да́руй, Чи́стая, да умертви́т неподо́бныя пре́жде сла́сти, и́хже ражда́ти обыко́ша чу́вства теле́сная, я́ко да бу́ду жили́ще Ду́ха.

Творя́й сту́дная, николи́же, Богома́ти, оста́вих, от младе́нства яви́выйся дом страсте́й, и ны́не в ста́рости пока́ятися даждь ми по́мысл, еда́ ка́ко избе́гну жду́щих мя мук.

Прегреше́ний стремни́ною поползну́выйся, низпадо́х лю́те с доброде́телей высоты́, Влады́чице Чи́стая; Ты у́бо, заступле́ние гре́шных и немощству́ющих, ру́ку ми пода́ждь по́мощи, моле́бнику Твоему́.

Страши́т мя суди́ще, Богома́ти Влады́чице, и убоя́хся, я́ко мно́гих зол испо́лнь, оба́че к Тебе́ прибего́х, прибе́жище гре́шных: не отри́ни мя, но спаси́ ми́лостию Твое́ю.

Стихиры, глас пятый. Подобны:Ра́дуйся, по́стников:

Радуйся, цветолюби́вый гра́де, сад живота́ окружа́яй, и ве́нче, Избра́нная, све́тлый, я́сное Созда́теля пребыва́лище, ски́ние, Невмести́маго вме́щшая Го́спода. Ра́дуйся, Де́во, Еюже ад умертви́ся и смерть упраздни́ся, и первозда́нный паде́жа спасе́ся лю́та и ве́лия. Ра́дуйся, Чи́стая, Всесвята́я; ра́дуйся, предсто́лпие непозы́блемо; Бо́га, ра́дуйся, Ма́ти, подаю́щаго ми́рови ве́лию ми́лость.

Ра́дуйся, красне́йшая Го́рлице, позлаще́неи целому́дрием иму́щи криле́, цве́те нетле́ния, у́мная багряни́це; ра́дуйся, ле́ствице Боже́ственная, к жи́зни небе́снеи́ ме́ртвыя преводя́щая; ра́дуйся, царе́й ве́рнейших держа́во и утвержде́ние и диади́ма честна́я; ра́дуйся, де́вство рождеству́ сопря́гшая, немощству́ющих врачевство́, лише́нных исполне́ние; Бо́га, ра́дуйся, Ма́ти, подаю́щаго ми́рови ве́лию ми́лость.

Ра́дуйся, по Бо́зе Превелича́йшая, вто́рство[56]по Тро́ице иму́щая; ра́дуйся, даро́в исполне́ние все от Бо́га несре́дственно Прии́мшая и во вся а́нгелы и человеки сие́ преда́вшая. Ра́дуйся, о́гненнаго небесе́ ди́вное дальнозре́ние, хоте́ний Боже́ственных чу́дный коне́ц[57]смотри́тельнейш и после́днии́ всего́ созда́ния, Всечи́стая, Ея́же ра́ди мир[58]бысть, и Твоим рождество́м преве́чный Творца́ сове́т испо́лнися.

Еди́на оскорбля́емых ра́досте, предвари́ изба́вити моле́бника Твоего́ от всех обдержа́щих мя искуше́ний многообра́зных, пламено но́сных неду́г и озлобле́ний, от враг, и́щущих пожра́ти мене́, от печа́ли вся́кия и демо́нскаго безу́мия, уны́ния и лю́таго осужде́ния, да не преда́си до конца́ ско́рбем, да не потопи́т мя глубина́ зол, окая́ннаго: на Тя бо все упова́ние мое́ возложи́х, Богора́дованная.