Ирмос: Ева у́бо неду́гом преслуша́ния кля́тву всели́ла есть: Ты же, Дево Богоро́дице, прозябе́нием чревоноше́ния ми́рови благослове́ние процвела́ еси́, тем Тя вси велича́ем.

Ору́жие на ны изостря́яй, отмсти́тель ара́влянин беззако́нная совещава́ет; Ты же, Де́во, си́лою Креста́ и мольба́ми Твоими, вооружа́вши нань Твоя́ моли́твенники; отону́дуже про пове́мы сла́ву Твою́.

Держа́ва у́бо Ты мне на враги́ дарова́ся, и от напа́стей изба́ви мя; что у́бо аз принесу́ Ти? Недоуме́ю вои́стинну; оба́че, Влады́чице, е́же и́мам, благодаре́ние Тебе́ приношу́: приими́ сие́ и спаси́ мя.

Ма́ти Всесве́тлая всех Творца́, оскорбля́емых утеше́ние, напа́ствуемых предста́тельство, оби́димых заступле́ние, ско́рое немощству́ющих посеще́ние, до сконча́ния живота́ моего́ соблюда́й мя.

Тесни́ма согреше́нии мно́гими и напа́сть- ми, Всепе́тая, не пре́зри мя; ны́не хвале́ния же́ртву Тебе́ приношу́, приле́жно взыва́я: Пресвята́я Богоро́дице, помози́ мне; Тя бо сла́вя, песнь соверша́ю.

Стихиры, глас четвертый. Подобны:Дал еси́ зна́мение:

Ра́дуйся, сладкоуха́нен Ши́пок еди́на прозя́бшая, доброто многовожделе́нная; ра́дуйся, Неискусобра́чная; ра́дуйся, сосу́де Боже́ственнаго и многоце́ннаго ми́ра; ра́дуйся, Еюже к небеси́ пре́жде умерщвле́ннии возведо́хомся, в бе́здну попо́лзшиися злодея́нием зми́евым; ве́рных огражде́ние неруши́мо, ра́дуйся, Непоро́чная.

Ра́дуйся, неистоща́емый Ток живота́ источи́вшая; ра́дуйся, же́зле, Цвет неувяда́емь прозя́бшая; ра́дуйся, Еюже Еде́м восприя́хом; ра́дуйся, еди́на безбо́жия пещь угаси́вшая; ра́дуйся, па́дшаго Ада́ма воста́ние, Всепе́тая.

Ра́дуйся, пресла́внейшая Царе́ва пала́то; ра́дуйся, Неве́сто Непоро́чная; ра́дуйся, купино́ неопали́мая; ра́дуйся, одр Боже́ственный;

ра́дуйся, предста́тельство упова́ющих на Тя; ра́дуйся, Госпоже́ вся́кия тва́ри; ра́дуйся, злата́я кади́льнице; ра́дуйся, всечу́дная Влады́чице; ра́дуйся, раю́ Боже́ственный, жи́зни Дре́во прозя́бшая.

Пла́чу и рыда́ю, напа́стей ны́не пещь на мя свире́пеющую зря, всеокая́нный, но к Тебе́, Де́во, злополу́чный, припа́даю: не пре́зри мя, Блага́я, не отри́ни мене́ недосто́йнаго, но ра́дости се́рдце мое́ испо́лни, Ра́дость поро́ждшая, да не пожре́т мя неключи́маго глубина́ скорбе́й.