Ирмос: Просвеще́ние во тьме лежа́щих, спасе́ние отча́янных, Христе́ Спа́се мой, к Тебе́ у́тренюю, Царю́ ми́ра, просвети́ мя сия́нием Твоим; ино́го бо ра́зве Тебе́ бо́га не зна́ю.

От кля́твы дре́вния мир я́ко изба́вила еси́, Влады́чице, ми́ру благослове́ние, Христа́ поро́ждши, помысло́в безме́стных изба́ви мя и вся́кия ско́рби, еди́на бо су́щи ве́рных весе́лие.

Бу́ря лю́тая духо́в лука́вых стремле́ньми мой по́мысл возмуща́ет; ско́ро предвари́ и ути́ши сию́, всея́ тва́ри Ро́ждшая еди́наго Окорми́теля, Христа́ всеси́льна.

Покая́ния свет просвети́ мне, во тьму па́губы все́льшуся, и пода́ждь ру́ку по́мощи Лежа́щу, и Твоими моли́твами воздви́гни, Богороди́тельнице, твори́ти Бо́жия оправда́ния.

Облежи́т град души́ моея́ де́монов полк и опустоши́ти зело́ покуша́ется; препросла́вленный Всецаря́ гра́де, остени́ ю́ столпостена́ми моле́ний Твоих и спаси́ мя, Влады́чице.