Ирмос: Твоя́ песносло́вцы, Богоро́дице, живы́й и независтный исто́чниче, лик себе́ совоку́пльшия духо́вно утверди́, в Боже́ственней Твое́й сла́ве венце́в сла́вы сподо́би.

Гора́ свята́я, Де́во, еси́ и присе́нная, Чи́стая; Отца́ бо си́ла не́бо Тя зве́здное, тве́рди же ны́не и́стинно вы́шшее яви́ла есть.

Безпло́тных ли́цы предстоя́т, Нескве́рная, со стра́хом Ти раболе́пно, пе́ти не возмога́юще; а́нгелов бо че́стность Твою́ я́ко превы́шшую показа́ла есть.

Неопа́льно купина́ пре́жде в Сина́и огню́ приобщи́вшися, Рождество́ Твое́ прояви́ обра́зно, Богоневе́стная; Той бо че́стность Твою́ я́ко всех превы́шшую показа́л есть.

Облак еси́ беле́йш, ка́пли с не́ба ве́рным одождева́яй и пра́вды Со́лнца возсиява́яй, Иже че́стность Твою́ я́ко всех превы́шшую показа́л есть.