Ирмос: Тя па́че ума́ и словесе́ Ма́терь Бо́жию, в ле́то Безле́тнаго неизрече́нно ро́ждшую, ве́рнии единому́дренно велича́ем.

Храм чист и престо́л Бо́жий одушевле́н Ты еси́, Всенепоро́чная, те́мже благода́рно Тебе́ хвалу́ возсыла́ем.

Озари́ла еси́ нам, Чи́стая, Невече́рний Свет, во тьме спя́щим пре́лести, Безневе́стная, те́мже «ра́дуйся» Тебе́ вси воспева́ем.

Ты мой плач, боле́зни и сле́зы, Влады́чице, угаси́, ра́дости же окая́нное мое́ се́рдце испо́лни, Богоневе́стная.

Плач и гнев, глад же, смерть и тле́ние низпосли́, Всецари́це Мари́е, скве́рным враго́м мои́м и отмще́ние.

Стихиры, глас пятый. Подобны:Ра́дуйся, по́стников:

Ра́дуйся, Матероде́во Чи́стая, Авеля пра́веднейшая, Си́фа благогове́йнейшая, благонаде́жная па́че Ено́са и паче Ено́ха благоуго́дная, род спа́сшая пра́ведный па́че Но́я, Авраа́ма ве́рнейшая, Исаа́ка же послушли́вейшая, в виде́ния Бо́жия дости́гшая па́че Изра́иля, по бе́ждшая Ио́сифа пло́ти добро́тою и Моисе́я кротча́йшая; Бо́га, ра́дуйся, Ма́ти, подаю́щаго ми́рови ве́лию ми́лость.

Ра́дуйся, Сампсо́на му́жественнейши, воево́ды Иису́са благоро́днейши, Дави́да же ца́рственнейши и Соломо́на и́стинно прему́дрши су́щая; проро́ки вся богозре́нием препобе́ждшая, апо́столы же богопропове́данием и му́ченики восхожде́нием ве́ры, преподо́бных всех в труде́х лоще́ния пребо́льшая и па́че иера́рхов всех Боже́ственная. Бо́га, ра́дуйся, Ма́ти, подаю́щаго ми́рови ве́лию ми́лость.

Ра́дуйся, всех дре́вних жен пра́веднейши без сравне́ния я́вльшаяся: Са́рры ве́рнейши и Рахи́ли красне́йши, Реве́кки чадолюбнейши, Ли́и же плодоро́днейши, песносло́внейши Мариа́мы и Авиге́и мудре́йши. Иуди́фь и Дево́рру му́жеством, Всечиста́я, превозшла́ еси́, па́че Анны же боголюби́ва была́ еси́ и Олды боже́ственнейши. Христа́, ра́дуйся, Ма́ти, подаюшаго ми́рови ве́лию ми́лость.

Неду́ги смире́нныя моея́ души́ и неисце́льныя телесе́ боле́зни, Де́во Благослове́нная, в ра́дость и́стинную претвори́, глас усте́н моих прие́мши, Всенепоро́чная, и ми́лостивно наложи́ я́звам моим Боже́ственныя цельбы́ бо́дренными моле́ньми Твоими. Озари́ ми здра́вия свет, Богоневе́сто, Ты бо наде́жда моя́, покро́в и держа́вное прибе́жище, и Твоего́ ско́раго посеще́ния, Мари́е Нескве́рная, тре́бую.