Ирмос: Неи́стовствующееся бу́рею душетле́нною, Влады́ко Христе́, страсте́й мо́ре укроти́ и от тли возведи́ мя, я́ко Благоутро́бен.

Яже Свет ро́ждшая свети́лом твори́телен, ду́шу мою́ просвети́ и изба́ви страсте́й, Всесве́тлая, омраче́ния.

Иже Ме́рры пе́рвее услади́вшаго, Богоро́дице, во́ды, Сы́на Твоего́ умоли́ лю́тых страсте́й го́речи ско́ро изба́вити мя.

Наводня́ет страсте́й пото́к ду́шу мою́, Всечи́стая, но сего́ изсуши́ мольба́ми Твоими и лука́вая помышле́ния потреби́.

Христо́с, челове́ки избавля́яй, от Сио́на прише́л есть, из чре́ва Твоего́, Всенепоро́чная Влады́чице; те́мже и мене́ от бед изми́ и скорбе́й.

Седален, глас пятый. Подобен:Собезна́чальное Сло́во:

Впучи́не житейстей вла́емь[61], попече́ньми земны́ми погружа́емь и соугнета́емь умо́м, Твою́ от души́ призываю по́мощь: ускоря́ющи про́чее, упра́ви и к покая́ния приста́нищу приведи́, да пою́ Тя, Де́во Нескве́рная.