Ирмос: Взако́не се́ни и писа́ний о́браз ви́дим, ве́рнии: всяк му́жескии́ пол, ложесна́ разверза́я, свят Бо́гу; тем перворожде́нное Сло́во, Отца́ Безнача́льна, Сы́на первородя́щася Ма́терию неискусому́жно, велича́ем.

Тече́ние слез, Де́во Ма́ти, да́руй ми стра́стному, и се́рдца печа́ль, плач душе́вный и воздыха́ние, я́ко да воспла́чуся ума́ моего́, зле умерщвле́нна, и милосе́рдствовав, Сын Твой воздви́гнет сего́ я́ко Ла́заря.

Чи́стая, Всесвята́я Влады́чице, ро́ждшая пло́тию Христа́, Еди́на от Тро́ицы, на́га мя доброде́тели вся́кия, доброде́телей тро́ицею се́ю обогати́: стра́хом Бо́жиим, умиле́нием и смире́нием огради́ мя́.

Умертви́ти пло́ти мудрова́ние вся́кое сло́во боговеща́тельное глаго́лет, в сем бо живи́тся душа́ и притека́ет к Бо́гу, и в кро́вы еди́ны восхо́дит небе́сный, и́хже ми улучи́ти моли́ Сы́на Твоего́, Богоневе́сто.

Но́щию страсте́й помраче́на озари́ мя, Влады́чице, безстра́стия днем; от но́щи у́тренюет бо к Тебе́ в сокруше́нии се́рдца, Чи́стая, дух мой, зане́ Свет на земли́ возсия́ла еси́ Го́спода.

Стихиры, глас третий. Подобны:Велия Креста́ Твоего́:

Ра́дуйся, проро́ков Бо́жиих, Чи́стая, похвало́; ра́дуйся, черто́же Госпо́день; ра́дуйся, о́блаче ле́гкий; ра́дуйся, Нескве́рная Ма́ти Благослове́нная; ра́дуйся, ра́досте ми́ра и заступле́ние; ра́дуйся, царе́й правосла́вных побе́до.

Ра́дуйся, держа́во апо́столов, Отрокови́це; ра́дуйся, златы́й све́щниче и манноприе́мная ста́мно; ра́дуйся, цве́те ве́ры; ра́дуйся, Свет неизрече́нно заче́ншая; ра́дуйся, престо́ле о́гненный Вы́шняго.

Ра́дуйся, ски́ние свята́я; ра́дуйся трапе́зо, мо́сте и ле́ствице; ра́дуйся, Госпо́дня горо́ несеко́мая, Де́во; ра́дуйся, сте́блие свяще́ннейшее и нетле́нное; ра́дуйся, Ма́ти Госпо́дня.

Ра́дости се́рдце мое́ испо́лни, Радостотво́рная, и Боже́ственнаго весе́лия, я́ко да при́сно сла́влю Твое́, Влады́чице, тве́рдое предста́тельство, не и́мам бо ра́зве Тебе́, Нескве́рная, ины́я наде́жды.